يوم مهم

ازيك يا معلمي ........ و الله يا عمنا انا مش عارف اقول ايه ولا ايه بس واضح اني ح احتاج ارغي معاك تاني زي الاول ..... انا في مزنق ابن ستين كلب , و في نفس الوقت مينفعش ارجع لأن ده مستقبل مش لعبة ... بس عارف احساس انك صغير ده فعلا وسخ ووسخ اوي كمان , عارف طبعا الاصرار و العزيمة و السلطات و البابا غنوج و الذي منه , بس برضه ما يمنعش ان الواحد يتفك معاك بكلمتين من غير ما تقفلي ع الواحدة يعني
الحوار صعب بس يستاهل , و كده كده انت عارف اني ببني للجيل اللي بعدي ولادي و ولاد ولادي , و عشانهم انا مستحمل و ح استحمل اللي جاي لأني عارف اني ممكن اكون مقبل علي ايام سودة و ح اشوف فيها احباط يتعبي في ازايز و ح احس بالضألة اكتر من دلوقتي ميت مرة , بس معلش ॥... شاء الله مع الوقت ح اتعود ع الوضع و اطبع عليه , أو اتعود ع الضألة و اطبع عليها ا ....

هي الفكرة ان كل حاجة بتحصل حواليا هي حاجة جديدة و مش عارف ح اقدر اعدي في الامتحان الصعب ده ولا لأ , و مش عارف جزء من صعوبته هي اني مركز في انه صعب , اصل حثل معايا موقف يعتبر قريب من ده قبل كده بس بشكل تاني لكن مع اني وقتها مكنتش مركز في حتة الصعوبة دي و علي الرغم من اني كنت بني أدم تاني خالص الا اني اقدر اعتبر نفسي عديته بنجاح و الحمد لله , لكن مش عارف ده ممكن انجح فيه ولا ح اتكعبل و لا ايه !!!!!!!!!

ما تديني رأيك طيب ولا انا عمال ارغي مع نفسي كده ,,,,,,
عموما , انا سبتلك تليفوني لو وصلت لأي جديد ابقي كلمني ,, و لو طالبه معاك عفانة ابقي رنلي و انا اكلمك
المهم بقي يا معلم انا لازم اسيبك دلوقتي عشان انا ورايا الجزء التاني من الملحمة بكره بدري ان شاء الله .... اما اشوف ايه اللي ح يحصل و ارجع احكيلك ... مش قلتلك شكلي ح اعمل معاك زي اللي كان عادل علي بيعمله فيا !!!!
ايه ده !!!! هو انت ماتعرفشِ عادل علي !!!!! و الله العظيم !!!! شوف يا سيدي , عادل علي ده بقي ... ح ابقي احكيلك حكايته بعدين لأني لازم انام دلوقتي و نكمل كلامنا بكره ان شاء الله
تصبح علي خير ,,,,,,

قصة جديدة

ازيك يا نجم ... تصدق انا بقالي زمن ما جتش اسلم عليك ولا اقعد معاك , و عارف طبعا انك ما اخدتش بالك من الموضوع ده بس مش مشكلة , المهم انت عامل ايه طمني علي صحتك و يارب تكون اتجوزت بلوجاية حلوة و بنت ناس ما تطلعش عينك و تخليك قاعد مخنوق و متضايق في اول يوم رضان ... قوللي صحيح هو انتوا بتصوموا ولا لأ , و الصيام عندكوا بيبقي عامل ازاي... يعني بتبطل تاخد كومنتات مثلا و لا تبطل يتكتب عليك مواضيع جديدة
ندخل في الجد بقي ولا ايه ,,,, انا زعلان ياصاحبي زعلان بجد و مش لاقي كلمة تانية تعبر عن اللي حاصلي دلوقتي لأني حاسسها اوي ... هو بصراحة الموضوع بقي ماسخ و سخيف و بايخ و دمه تقيل من فترة ,, بس علي الرغم من كده متضايق ان النهاية جت خلاص ॥ مش متضايق لأ زعلااااااااااااااااااااااان و التوقيت كمان بايخ قوي بس ح اعمل ايه كل يوم بيعدي و الموضوع زي ماهو السخافة بتزيد اكتر و كان لازم انهي و اقطع عرق و اسيح دمه مع ان العرق ده في ايدي انا و الدم اللي ح يسيح ده دمي انا ,,, بس وجع ساعة ولا كل ساعة ,, و الله العظيم يا عم انا كان نفسي النت يقطع الكهربا تقطع الكمبيوتر يفرقع عشان تبقي حاجة اقول بيها الشهادة لله ولا مش الشهادة لله , بس محصلش حاجة من دي و برضه فضلت متردد بس مكنش فيه حل تاني يخليني ابقي محترم قدام نفسي.... هي اللي اجبرتني علي كده لأن لو كان الموضوع ماخلصش و كمل علي كده كان ح يبقي مبني علي غلط و الغلط ده ح يتبني عليه غلطات تانيه ممكن تخلي الموضوع يبوظ برضه بس وقتها يا عالم ح نكون وصلنا لفين و لو كان فيه نصيب و الموضوع رجع تاني تاني يبقي ح يرجع علي اساس صح و اللي يتبني عليه بعد كده يبقي صح .... قدر الله و ما شاء فعل ... وواضح اني ح ابقي اجيلك الفترة اللي جايه دي كتير لأن دطول ما انا زعلان ح افضفض لأمك لغاية ما تكتئب مني في مرة و تسود و ابيعك و اعمل بلوج تاني و ابقي اجيله كل ما ابقي فرحان مش نحس زي اللي جابتك ... يلا يا عم غور بلاش قرف جتكوا البلاوي في اللي مشغلينكموا