أفشتك

بقي يا بلج يا واطي أظبطك قاعد بتحلق عند أرفص يا معفن , أمال علي ايه بقي النفخة اللي انت فيها دي ... ياللي بتحلق ببيضة و رغيف يا بتاع حاسب رجلك يا بيه الترماي معدي , يالا يا بتاع أرفص
............................................. ؟
مكنتش رايح في حتة , انا كنت مستني دوري

وتني

وتني حبيبي الوتن الأكبر يوم ورا يوم انداله بتكتر و انتساراته ماليه حياته وتني بيكبر و بيتدحدر ....... وتني ... وتني

أم فؤاد

بلج باشا .. واحشني و الله يامان , ايه شكلك نايم أو لسه صاحي او مضروب بالجزمة علي سحنة أهلك ع الصبح , المهم انا ياسيدي ليا مزاج أحكيلك عن حد واحشني جدا جدا بس للأسف مش هينفع أشوفه اللي هي الحاجة أم فؤاد اللي هي تبقي ستي أم أبويا - صحيح أن كل الستات كانوا بيقولولها يا أم فئاد بس ده مش موضوعنا يعني - ستي دي بقي يا سيدي حاجة كده م اللي بييجوا في الافلام - كان فيها شبه كبير جدا من امينة رزق بس علي أحلي و الله- عارف انت الست اللي تربي ولادها في ظروف زي الزفت بسبب أن جوزها مش مهتم بيها ولا بولادها _ جدي ده حدوتة جامدة جدا ح ابقي احكيهالك بعدين - مما يترتب عليه من مشاكل كتير لكنها ماشاء الله مطلعش من تحت ايدها عيل بايظ - كانت دايما تقولي الجملة دي - لكن علي بال ما شفتها انا كانت قاعدة علي كنبة في الصالة مبتتحركش من عليها و كان نظرها ضعف أوييييييي بس كانت موجودة في الدنيا يعني عاملة أكشن مش مجرد واحدة مش قادرة تتحرك و بتاكل و تشرب و خلاص يعني , أفتكر اني لما كنت عامل عملية اللوز بعد ما جابوني من المستشفي اني دخلت من باب الشقة قعدت علي حجرها و فضلت أعيط - أكيد البنج كان عامل شغل لسه - و افتكر يوم زلزال 92 أول حاجة عملتها لما لقيت الناس بتجري ع السلم و بيقولو البيت بيقع اني جريت جبتلها الكرسي ابو عجل و قعدت أقولها يالا يا ستي بس هي قالتلي لو مكتوبلي أموت يبقي أموت في بيتي بدل ما اموت و انا بجري ع السلم و ابويا كمان قاللي نفس الكلام و قاللي متنزلش , افتكر اني كنت و انا في خامسة ابتدائي كنت بقعد احكيلها قصة علاء الدين اللي كنا بناخدها في المدرسة , علي فكرة في ناس انا ببقي مبسوط أوي لما بشوفهم بيضحكو و مش شرط يكونو قرايبي او اصحابي يعني ح تقول عليا عبيط لو قلتلك ان منهم يحيي الفخراني المهم ان الناس دول كانت منهم ستي ياااااااااااااااه كنت ببقي مبسوط أوي لما بتضحك و ياسلام لوكنت انا سبب الضحك ده , مرة كانت عايزه تكلم وحدة قريبتنا و مكنش ابويا ولا امي موجودين راحت قايلالي اطلب النمرة وهات التليفون المهم طلبت النمرة وقولتلها بيرن راحت واخده الساعة و قالت مييييييييييييين أبو علي !! - جوز قريبتنا - بعدين سكتت و قالت : طب انا اسفة يابني معلش , طبعا مش محتاج اقولك اني طلبت النمرة غلط لكن قعدنا لفترة متقلش عن اسبوع نفتكر الموضوع كل يوم و نضحك لأن كمان هي كانت بترد بعشم أوي و بطريقة بترن في ودني لغاية دلوقتي تموت م الضحك ,مرة كنت انا و اخويا متخاصمين و كانت هي بتكلمني في الحوار ده فكانت بتقولي الواحد لما بيتعور بيقول أخخخ - كانت بتقولها بطريقة حلوة أوي - لأن الواحد وقت الشدة بيلاقي أخوه جنبه او بيحتاج اخوه يعني رحت انا قايلها انا لما بتعور بقول ايييي- قلدتها - لقيتهالك ياريس قعدت تضحك لغاية مابطنها وجعتها و نسيت موضوع الخصام و هاتك يا ضحك, بس كنت بتضايق أوي لما تقولي ان انا بفضل أغيظ في أخويا لغاية مايتعصب و بعدين أعمل غلبان قدامهم و كنت بتبسط أوي لما كانت بتقولي : انت اللي ح تتجوزها ح تخليها تضحك علي طول - كانت بتقولي كده لما نكون حلوين مع بعض,علي فكرة ستي توفاها الله و انا في تانية ثانوي يعني من حوالي 7 سنين ,الله يرحمك يا ستي, المهم كفاية عليك كده عشان عايز أكمل مذاكرة لأن فترة الراحة خلصت , بس تعرف.......... ستي وحشتني أوي

اتفرج يا عم

سلام عليكم يا عم بلج .. شوفت اللي بيحصل في الدنيا و انت نايم علي ودانك .. تخيل واحد شاعر زميل معرفش اسمه لقيته كاتب بيت شعر بيقول فيه
اذا هممت حبيبتي بسيفك لتقتليني
فاحذري ان يجرحك لئلا تؤلميني
طبعا انت حمار و مش فاهم حاجة , الراجل سبع البرمبة (بالمناسبة متعرفش يعني ايه سبع البرمبة دي !!!!!!!!!) الباشا تقريبا كان متخانق هو و المدام علي فلوس ماتعرف بسبب حماته ماتعرف , المهم هي قامت تجيب سكينة من المطبخ عشان تجيب رقبة أمه ع الأرض , يقوم لما يتشملل و ياخد موقف يقولها و انت بتدبحيني حاسبي تعوري نفسك عشان لو اتعورتي انا ح اتضايق , بروح أمك انت ح تبقي في ايه ولا في ايه !! دانت ناقص تروح تتفق مع التربي و بتوع الفراشة تربط معاهم من دلوقتي عشان هي متشيلش هم , انا اموت و اشوف منظر أمك عامل ازاي , أصل مش معقول تبقي شاعر ويبقي اسمك لولو مثلا و حجر بنطلونك في ركبك و موقف شعرك لفوق و الوحي بيعدي عليك في مارينا تكتبو قصايد سوا , ياخي الله يحرقك انت و اللي زيك - سبني ياعم بلج متحوشنيش ده عيل سيس صحيح - دانا لو مكانها مش ح أهم بالسيف عشان أجرحك انت أخرك قلم رصاص مسنون و أشوه و ش أهلك .. يالا يابن العبيطة , اوعي يا بلج متنرفزنيش يووووووووووه

و الله فكرة

تصدق يا عم بلج انا حاولت كتير أوي من وانا صغير اني اكتب مذكراتي ( ح تقولي طب و انت صغير كانت ايه الذكريات اللي عايز تكتبها هو انت لسه عشت أي حاجة عشان تحكيها , هقولك و انت مالك يا حشري انت معمول عشان انا اللي اتكلم مش عشان أسئلتك البايخة دي و كمان انا كنت طفل متفتح يا أخي ) المهم ان كل المحاولات فشلت و كل مرة يبقي السبب غير اللي قبلها و اللي بعدها انما جتلي دلوقتي فكرة اني اكتب مذكراتي مش شرط بالترتيب يعني بس الوقت اللي ييجي في دماغي و ابقي عايز اتكلم عنه أروح جايبك من قفا أمك و اقعد احكيلك علي كل حاجة و طبعا وجهة نظرك ح تكون نفس وجهة نظري و إلا و الله اقفلك و اعمل واحد تاني مطيع و مؤدب و مبيسألش أسئلتك البايخة و أقعد احكيله و هو زي الجزمة

بيني و بينك انا دخلت علي شوية لنكات عند رضا بس من غير ماتعرف هي و قعدت اتفرج ع الناس بيكتبو ايه بصراحة مفهمتش أي حاجة و مش عارف هم فاهمين حاجة ولا ايه , بس انا مبعرفش اتكلم عن الانحرافات المتقوقعة داخل الجحر الجرثومي المنبعث من أشلاء الازدواجية الحياتية لحمص الشام , انا عندي مواضيعي اللي افهم فيها عندي اصحابي و سلاطاتي و باباغنوجي و كل الاشياء الهليهلي ( ده مصطلح لغوي نابع من قاع المجتمع أي من حئالة البشر و الغير مثقفين أمثالي ) المهم يابو البلاجيج انا قررت اهريك مذكرات و قصايد عبيطة لما تقول حقي برقبتي ,
قوللي صحيح مشوفتش ورق السمي كوندكتور

يالهوي

الحقني يا عم بلج مش لاقي ورق السمي كوندكتور , أكونش ادتهولك و نسيت

امير عزل

حيث ان المذاكرة حاجة تزهق و حيث ان انا مش عارف اذاكر .. عايز احكي اي حاجة في المكان المخصص للرغي اللي لا طائل منه ,اقول اي حاجة بعدين اذاكر
من حوالي أسبوعين كده كلمني واحد صاحبي اسمه امير , امير دا صاحبي من ايام اولي ثانوي مع ان هو كان في فصل و انا في فصل تاني و مع ان هو كان اتخن و اضخم واحد في فصله و انا اقصر و ارفع واحد في المدرسة إلا اننا بقينا اصحاب مش فاكر ازاي لكن فاكر ان بعدها خدنا درس فيزيا مع بعض هو اللي خلانا اصحاب قوي بالشكل ده و كانوا العيال مسمينا لوريل و هاردي و فاكر ان لغاية ما اتخرج هو من كلية تجارة جامعة المنوفية كانت الحاجه والدته بتاخدنا بعد ظهور النتيجة تعزمنا علي سينما و تقولنا انا دلوقتي اللي بدفع لكن انتو لما تشتغلو ح خليكو تخرجوني و تعزموني علي كل اللي انا عايزاه , و بعاملها لغاية دلوقتي زي امي و ساعات لما ببقي متضايق بقعد ارغي معاها و هي سبحان الله ليها طريقة غريبة بتخليني مستريح جدا و علي فكره هي اليومين دول بتعمل عمرة , نرجع للتليفون يتاع امير , انا لقيته بيتكلم من نمرة غريبة قلتله ( و انا بتريق طبعا ) ايه يا معلم غيرت نمرتك ولا عزلت , قاللي لأ عزلت وعارف جيت فين في الشارع اللي وراك , الصراحة انا قعدت اضحك مش عارف ليه مع انه كان عمال يقولي انا حاسس بالغربة و انا متضايق تعالي الحقني , المهم روحت ضارب العباية و الشبشب نازله استنيته عند الفرن و روحت شفت الشقه و قعد يقولي انه مش لاقي سوق في المنطقه و انه مش يجيب اي حاجة , المهم من يومها و انا متبني امير و بحاول اشوفه علي قد ما اقدر عشان ميحسش بالغربه و ساعات بعدي انده عليه من غير سبب بس عشان اصيته يعني و الناس تعرف اسمه و بحاول اعرفه علي اصحابي اللي في المنطقه , و مرة كنت مع هاني لقيت امير باعت بيقولي : هو اللي عايز ياكل فراخ مشوية في حتتكو دي بيروح فين ,
و دلوقتي بقالي كام يوم مشوفتوش من ساعة اخر مرة كنت عنه و كنت ح اقع من المنور عشان كنت بليس الماسورة بتاعت المطبخ ( اليسها يعني بحط عليها جبس و اسمنت مش البسها لأن المعني مختلف تماما )
كفاية عليك كده يا بلج افندي عشان عايز اذاكر

اول الكلام ( كلب الست)

مبدأيا دي اول مرة اكتب حاجة مع العلم اني لسه مش فاهم ايه البتاع اللي انا بكتب فيه ده بس ادينا بنتعرف , اهلا و سهلا يا بلج ياخويا ازي صحتك و الانجال عاملين ايه مش بخير برضه ربنا يباركلك فيهم و تشوفهم مواقع كبيرة أد الدنيا و مليانين اعلانات... انا الحمد لله اهي ماشية ببركة دعاك لينا , المهم خد الحتة الدي من الشيخ امام اكتر واحد بسمعله من الناس القدام حاجة كده علي مزاجك اسمها كلب الست

كلب الست
ف الزمالك من سنين
و ف حمى النيل القديم
قصر من عصر اليمن
ملك واحدة من الحريم

صيتها أكتر م الأدان
يسمعوه المسلمين
و التتر
و التركمان
و الهنود
و المنبودين

ست فاقت ع الرجال
ف المقام و الاحترام
صيت و شهرة
و تل مال
يعني في غاية التمام

قصره يعني هي كلمة
ليها كلمة ف الحكومة
بس ربك لجل حكمة
قام حرمها م الأمومة
و الأمومة طبع ثابت
جوه حوا من زمان
تعمل ايه الست
جابت فوكس رومي و له وان

فوكس دا عقبال إملتك
عنده دستية خدامين
يعني مش موجود ف عيلتك
شخص زيه يا اسماعين

و اسماعين دا يبقى واحد
م الجماعة الغلبانين
اللي داخو ف المعاهد
و المدارس من سنين

حب يعمل واد فكاكه
و يمشي حبه ف الزمالك
و القيامة و الفتاكة
يرموا طبعا ع المهالك
غم سمعه من قيامته
حب يعمل فيها فله
بعد ما ألوط بيجامته
اشترى حتة مجله

قول مش بيقراف حكاية
من حكايات الغرام
و اندماجه ف القرايه
خلا مشيه مش تمام

ع اليمين يحدف بعيد
خطوتين
و تروح شمال
لمحه فوكس من الحديد
قال دا صيد
سهل و حلال

هب نط ف كرشه دوغري
جاب بيجامته لحد ديلها
اسماعين بدال ما يجري
قال يا رجلي
رجلي مالها

بص شاف الدم سايح
من عاليها و من واطيها
و ياللي جاري
و ياللي رايح
المجلة مش لاقيها

حبه و تلمو الظنايا
اللي هما البوابين
و الهكايه و الروايه
قال لهم دا كلب مين ؟
كلب مين
ما كلب مينشي
سمعه لبخ حبتين
قال له واحد فيهم امشي
اللي جابك انده مين

قال دا شارع يا مواشي
للجميع
راكب و ماشي

كلمة من دا
و كلمة من دا
ظاطو و انقلبت فضيحة
قول نهايته و القصد من دا
اسماعين شرب الطريحة

راحو اسم الشرطة جمعا
و النيابة كفيلة بيهم
و اترموا ف الحجر طبعا
لما ييجي الدور عليهم
شاف بلاوي ما تنحكيش
م الهفايا المحبوسين
قال يا عالم
يا شاويش
يا نيابة .. يا مسؤلين

خلصوه بعد المناهدة
جثه
من جحر الديابه
هي يمكن ساعة واحدة
كان ف مكتب النيابة

قال له ـ مالك يا اسماعين
قال له ـ زي البمب مالي
قال له ـ عضك فوكس فين
قال له ـ سيبني أروح لحالي
انت شوف سي فوكس يمكن
خد تسمم غصب عني
الوكيل قال برضه ممكن
و الشاويش قعد يغني
هييص يا كلب الست هيص
لك مجامك ف البوليس
بكرة تتولف وزارة
للكلاب
ياخدوك رئيس

انت توى ف النيابة
تسعمية من الغلابة
طب يا ريت يا فوكس كنا
و لا تربطنا الجرابة

انت فين و الكلب فين
انت كده يا اسماعين
طب دا كلب الست يا ابني
و انت تطلع ابن مين

بشرى لصاحب الديول
ولــللي له أربع رجول
بشرى لسيادنا البهايم
من جمايس أوعجول
اللي صاحبه يا جماعة
له أغاني ف الاذاعة
راح يدوس فوق الغلابة
و النيابة
بالتباعة
هيص يا كلب الست هيص
هيص يا كلب الست هيص



يارب تكون عجبتك , ولو معجبتكش برضه عجباني و انت مالك يابارد بقولك ايه عايزين نبقي حلوين مع بعض من أولها عشان باين ح نقعد كتير مع بعض خليك حلو عشان احبك , سلام