أم فؤاد

بلج باشا .. واحشني و الله يامان , ايه شكلك نايم أو لسه صاحي او مضروب بالجزمة علي سحنة أهلك ع الصبح , المهم انا ياسيدي ليا مزاج أحكيلك عن حد واحشني جدا جدا بس للأسف مش هينفع أشوفه اللي هي الحاجة أم فؤاد اللي هي تبقي ستي أم أبويا - صحيح أن كل الستات كانوا بيقولولها يا أم فئاد بس ده مش موضوعنا يعني - ستي دي بقي يا سيدي حاجة كده م اللي بييجوا في الافلام - كان فيها شبه كبير جدا من امينة رزق بس علي أحلي و الله- عارف انت الست اللي تربي ولادها في ظروف زي الزفت بسبب أن جوزها مش مهتم بيها ولا بولادها _ جدي ده حدوتة جامدة جدا ح ابقي احكيهالك بعدين - مما يترتب عليه من مشاكل كتير لكنها ماشاء الله مطلعش من تحت ايدها عيل بايظ - كانت دايما تقولي الجملة دي - لكن علي بال ما شفتها انا كانت قاعدة علي كنبة في الصالة مبتتحركش من عليها و كان نظرها ضعف أوييييييي بس كانت موجودة في الدنيا يعني عاملة أكشن مش مجرد واحدة مش قادرة تتحرك و بتاكل و تشرب و خلاص يعني , أفتكر اني لما كنت عامل عملية اللوز بعد ما جابوني من المستشفي اني دخلت من باب الشقة قعدت علي حجرها و فضلت أعيط - أكيد البنج كان عامل شغل لسه - و افتكر يوم زلزال 92 أول حاجة عملتها لما لقيت الناس بتجري ع السلم و بيقولو البيت بيقع اني جريت جبتلها الكرسي ابو عجل و قعدت أقولها يالا يا ستي بس هي قالتلي لو مكتوبلي أموت يبقي أموت في بيتي بدل ما اموت و انا بجري ع السلم و ابويا كمان قاللي نفس الكلام و قاللي متنزلش , افتكر اني كنت و انا في خامسة ابتدائي كنت بقعد احكيلها قصة علاء الدين اللي كنا بناخدها في المدرسة , علي فكرة في ناس انا ببقي مبسوط أوي لما بشوفهم بيضحكو و مش شرط يكونو قرايبي او اصحابي يعني ح تقول عليا عبيط لو قلتلك ان منهم يحيي الفخراني المهم ان الناس دول كانت منهم ستي ياااااااااااااااه كنت ببقي مبسوط أوي لما بتضحك و ياسلام لوكنت انا سبب الضحك ده , مرة كانت عايزه تكلم وحدة قريبتنا و مكنش ابويا ولا امي موجودين راحت قايلالي اطلب النمرة وهات التليفون المهم طلبت النمرة وقولتلها بيرن راحت واخده الساعة و قالت مييييييييييييين أبو علي !! - جوز قريبتنا - بعدين سكتت و قالت : طب انا اسفة يابني معلش , طبعا مش محتاج اقولك اني طلبت النمرة غلط لكن قعدنا لفترة متقلش عن اسبوع نفتكر الموضوع كل يوم و نضحك لأن كمان هي كانت بترد بعشم أوي و بطريقة بترن في ودني لغاية دلوقتي تموت م الضحك ,مرة كنت انا و اخويا متخاصمين و كانت هي بتكلمني في الحوار ده فكانت بتقولي الواحد لما بيتعور بيقول أخخخ - كانت بتقولها بطريقة حلوة أوي - لأن الواحد وقت الشدة بيلاقي أخوه جنبه او بيحتاج اخوه يعني رحت انا قايلها انا لما بتعور بقول ايييي- قلدتها - لقيتهالك ياريس قعدت تضحك لغاية مابطنها وجعتها و نسيت موضوع الخصام و هاتك يا ضحك, بس كنت بتضايق أوي لما تقولي ان انا بفضل أغيظ في أخويا لغاية مايتعصب و بعدين أعمل غلبان قدامهم و كنت بتبسط أوي لما كانت بتقولي : انت اللي ح تتجوزها ح تخليها تضحك علي طول - كانت بتقولي كده لما نكون حلوين مع بعض,علي فكرة ستي توفاها الله و انا في تانية ثانوي يعني من حوالي 7 سنين ,الله يرحمك يا ستي, المهم كفاية عليك كده عشان عايز أكمل مذاكرة لأن فترة الراحة خلصت , بس تعرف.......... ستي وحشتني أوي